23. april 2002

UPA2002/17

 

Illuliortiternernut aningaasalersuineq pillugu Inatsisartut peqqussutaata allanngortinneqarneranik Inatsisartut peqqussutissaattut nr. xx, xx. xx 2002-imeersussatut siunnersuut pillugu

Inatsisartut Attaveqarnermut Pilersuinermullu aamma Ineqarnermut Ataatsimiititaliaata

ISUMALIUTISSIISSUTAA

Aappassaanneerinissamut saqqummiunneqartoq

 

Inatsisartut Attaveqarnermut Pilersuinermullu aamma Ineqarnermut Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Godmand Rasmussen, Atassut, siulittaasoq
Inatsisartuni ilaasortaq Tommy Marų, Siumut, siulittaasup tullia
Inatsisartuni ilaasortaq Per Rosing-Petersen, Siumut
Inatsisartuni ilaasortaq Ole Lynge, Inuit Ataqatigiit
Inatsisartuni ilaasortaq Mogens Kleist, Kattusseqatigiit

 

UPA2002-imi siullermeerinninerup kingorna Inatsisartut Attaveqarnermut Pilersuinermullu aamma Ineqarmut Ataatsimiititaliaata siunnersuut misissuataarpaa imatullu oqaaseqarfigissallugu.

Ataatsimiititaliap isumaqatigiittup peqqussutissatut siunnersuutip saqqummiunneqarnerani tunngavigisat tassalu pisortanit aningaasalersukkanik illunik amerlanerusunik pissarsisarsinnaanerup aamma illut namminersortunik pigineqartut amerlisarneqarnissaasa anguniartuarneqarnissaata ingerlatiinnarneqarnissaat tamakkiisumik tapersersorpai.

Ataatsimiititaliap naammagisimaarlugu maluginiarpaa peqqussutissatut siunnersuutikkut illuliortiternermi aningaasalersueriaatsitigut malittarisassat eqqaallisarneqarnissaat qulakkeerneqarmat, taamaasilluni assersuutigalugu inunnut ataasiakkaaginnarnut tunngatinneqarunnaarluni aammali suliffeqarfinnut tunngatinneqalerluni.

Aamma ataatsimiititaliamit naammagisimaarneqarpoq, siunnersuutikkut illumut kvadratmeterinut qassinut taarsigassarsisitsisoqarsinnaanera annertunerpaaffilerneqarmat, kiisalu kvadratmeterimut aningaasat atorsinnaasat amerlanerpaaffilerneqarlutik.

 

Ataatsimiititaliap siunnersuummi § 10 imm. 1 sukumiinerusumik oqaluuseraa.

§ 10 imm. 1 imatut oqaasertaqarpoq "§ 1 imm. 1 naapertorlugu illuliornissanut taarsigassarsianik qinnuteqaatit Naalakkersuisunit Kommunalbestyrelsimillu suliarineqartussanngorlugit kingusinnerpaamik marsip aallaqqaataani nassiunneqareersimassapput.....".

Ataatsimiititaliaq isumaqarpoq, ukiut tamaasa ullormik aalajangersimasumik qinnuteqarnissamut piffissaliilluni innuttaasut taarsigassarsiniarnissamut periarfissaasa killiliivigineqarnerat pissusissamisuunngitsoq. Oqaatigineqartutut immikkoortumi tassani eqqaallisaanissaq pissusissamisuussaaq.

Taamaattumik Naalakkersuisut aappassaanneerinissamut tamatumunnga naapertuuttumik allannguutissatut siunnersuuteqaqqullugit ataatsimiititaliamit qinnuigineqassapput.

Taamatut oqaaseqarluni ataatsimiititaliap inassutigaa, illuliortiternernut aningaasalersuineq pillugu Inatsisartut peqqussutaata allanngortinneqarneranik Inatsisartut peqqutissaattut siunnersuut Inatsisartunit, ataatsimiititaliap inassuteqaataani iluserilikkamisut iluseqarluni Naalakkersuisut allannguutissamik siunnersuuteqarsimalerpata suliareqqinneqassasoq.

 

	Godmand Rasmussen Atassut, Siulittaasoq
Tommy Marų, Siumut siulittaasup tullia		Per Rosing-Petersen, Siumut
Ole Lynge, IA		Mogens Kleist, Kattusseqatigiit